محمود داود – مغلقة مؤقتًا

سؤال وجواب حول برنامج سلاح ابيض وقناة امجاد

Posted in مسيحيات by memod on أكتوبر 24, 2013

ياريت لا تسأل قبل أن تقرأ . وإن لم تقرأ فلا تسأل .
كتبه / محمود داود

في شوية اسئلة كده اتعرضت وبتدور في ذهن بعضكم فاسمحوا لي اجاوب عنها . مبحبش اتجاهل حد رغم ان التجاهل مريح وحاجه زي العسل . لكن عشان في ناس بتسأل بعشم وبتسأل بهدف الاستفسار يبقى كان لازم أرد تقديرًا لهم .

بدأت بعض التلميحات والعبارات الغير مقبولة من البعض بسبب برنامجنا ” سلاح أبيض” على قناة أمجاد واللي بقدمه أنا ومعاذ عليا.. فأنا أقدر بعض هذه العبارات على اعتبار ان أصحابها كتبوها على سبيل الغيرة علينا أو بهدف الاستفهام . أما من كتبها للاستهزاء والترويش . فكن مستعد أنت على موعد مع التظبيط :
D

يعلم الله وهو عالم الغيب وأعلم بنيتي . أني لن أكتب حرف على سبيل التفاخر أو التكبر . ولكن أنا بدافع عن نفسي . وأرجو أن تتفهموا الأمر .

الحكاية ببساطة :
اني مسلم بسيط جدًا وبيحب دينه وبيحاول يعمل شئ مفيد . ولي من “مئات  الاصدقاء ” اللي أتشرف بمعرفتهم من عام 2005 إلى الان . يعني كان عندي وقتها ” 19 سنة بس ”  يعني قبل ما الفيسبوك ينتشر . ولما بقول ” اصدقاء ” ده معناه اني بقابلهم وبنخرج مع بعض وبنسهر مع بعض و بنتواصل مع بعض . ببساطة : انا مش واحد ظهر بعد الثورة في الهوجه وهوب عمل صفحة على الفيسبوك وهوب الناس عرفته ولا الحوارات الفاشلة دي .. وببساطة ممكن تقعد مع أي صديق فيهم ويحكيلك ” عني ” من 2005 إلى الآن ومعظهم موجود على الفيسبوك وعلى رأسهم ( حسام أبو البخاري –  خالد المصري – معاذ عليان – محمد حمدي – محمود عليان – ابو المنتصر شاهين – أبو عمر الباحث – وجدان العلي – أحمد الغريب – أحمد جاويش – رضا قلقيلة ) وغيرهم . ببساطة يعني . أنا مش شخص غامض . بل ربما تجد من يعرف عني أكثر مني😛  والاصدقاء دي مش متمركزين مثلا في القاهرة عشان أنا منها . لا هتلاقي منهم مثلا 30 في اسكندرية و 40 في الصعيد و 10 في الاسماعيلية الخ الخ الخ الخ .. ببساطة يا إبن الحلال لو جاي وناوي على ” تشويه ” فإن شاء الله هتلاقي صعوبة ما بعدها صعوبة . لاني لو كنت مجهول بالنسبة لك . فأنا لستُ مجهول عند غيرك من سنوات وأتشرف بذلك .

ورغم اني مبحبش اتاجر بالمواقف و لم يوفقني الله برحمته وفضله ومَنه وكرمه وعملت الحاجات دي عشان اتباهى بها . ولكن مش حابب اني اسكت في الدفاع عن نفسي . ومش هسألك كنت فين عام 2005 أو كنت بتعمل أيه لما كان عمرك 19 سنة ! ومش هسألك لان هذا توفيق وفضل من الله وليس مني . ولو ربنا موفقنيش ومَن عليا برحمته وكرمه . كان زماني لما كان عندي 19 سنة راكب موتسيكل صيني ومشغل ” اه يا بت يا فايزة – ركبك بايظة ) وبعاكس البنات في الشارع .  عامة مش من اللطافة اني أسألك السؤال ده . ومش من اللطافة انك تكيل لي الاتهامات قبل ما تعرفني .

خد عندك . دي حلقة لي على قناة الحافظ عام 2010 قبل الثورة يعني

http://www.youtube.com/view_play_list?p=827C3E65BD5C20CC

خد عندك حلقة لي على قناة الحافظ عام 2010 قبل الثورة برده . تصدق ؟

http://www.youtube.com/view_play_list?p=FABEAAECF8CCD7A0

حلقات ع اليوتيوب في 2010 قبل ما يتوفر لي الظهور على قناة الحافظ :

((**)) حلقات على قناة المخلص -برنامج فتشوا الكتب:
(1) هل بنوة المسيح حقيقية ام رمزية؟ للرد على زكريا بطرس:
http://www.youtube.com/view_play_list?p=FAF876C38A6A69D9

(2) هل يوجد ما يسمى باللاهوت والناسوت؟للرد على زكريا بطرس:
http://www.youtube.com/view_play_list?p=7601F9502DBAA621

(3) هل حقاً يعبدون الإنسان؟! للرد على زكريا بطرس:
http://www.youtube.com/view_play_list?p=534F9A30276D7341

(4) هل حقاً مات الإله ؟! للرد على زكريا بطرس:
http://www.youtube.com/watch?v=uFwgJperr4c

(5) هل هناك تعدد للزوجات فى العهد القديم؟ للرد على زكريا بطرس:
http://www.youtube.com/watch?v=KLEZpZXwk5Q

(6) هل هناك ما يمنع تعدد الزوجات فى العهد الجديد؟ للرد على زكريا بطرس:
http://www.youtube.com/watch?v=MW92Oemn8Ow

========= .

الحلقات كلها عن مقارنة الأديان . وعام 2010 قبل الثورة . في الوقت اللي كان حد بيخاف يسلم على مسيحي احسن يفتكروه ارهابي . والحمد لله لم أهاب أحد رغم صغر سني . وهذا الفضل لله وحده ولولا فضل الله وكرمه ومنه ما وفقت للنطق بحرف واحد .

========= .

وهذه بعض المناظرات الصوتية  لي مع قساوسة من عام 2007

http://www.eld3wah.net/play.php?catsmktba=269

أما هذه الحلقة فكانت عام 2012 بعد مذحبة العباسية على قناة ” المحور ” وكانت الحلقة حول : من المُدان في هذه المذابح ؟

http://www.youtube.com/watch?v=OwFfffnLKPU

من الآخر: انا مش هخاف ولا خايف ولا بخاف .

وأنا مش متحدث رسمي بإسم قناة أمجاد . ولكن هجاوب على بعض الأسئلة :

طيب أيه حكاية برنامج سلاح أبيض ؟

في شخص اسمه ” اسلام البحيري ” وغيره كتير .  عامل برنامج تلفزيوني وبيشوه الاسلام للعوام . ومفيش حد بيرد عليه . ولو حد رد عليه بيكون الرد على الانترنت . وانا ميهمنيش الناس اللي على الانترنت . انا يهمني أهلي اللي قاعدين أمام التلفزيون وميعرفوش عن الكمبيوتر إلا شكله فقط . يعني أنسى حكاية اليوتيوب دي .

وأُتيحت الفرصة للرد عليه على برنامج تلفزيوني . أضيع الفرصة دي ؟ معلش أبقى غلطان . والمفروض ” أنت ” من تشجعني وتساعدني . زي ما  العلمانيين بيساعدوا اللي اسمه اسلام البحيري وبينشروا حلقاته وبيقفوا معاه . وانت جاي تقف وتقولي أنت بقيت تبع أمن الدولة😀  وربنا انتوا شوية تحف بس عساسيل وكده يعني

طيب هل البرنامج في الوقت ده يعتبر شرعنة للانقلاب ؟

لو انت شايف انه شرعنة للانقلاب يبقى اتفضل مشكورًا سيب شغلك واقعد في البيت . وخاصة لو كنت شغال في وظيفة حكومية . حتى لا تساهم في نجاح حكومة الانقلاب . ولو قلت لي ” ده أكل عيشي” هقولك انت خايف على أكل عيشك ومش خايف على الناس اللي بيتلاعب بعقولها وبيشككوا ف دينهم ! ومش هقولك ان الاعلام أكل عيشي أنا كمان . لاني واخد الإعلام ” رسالة ” وليس مهنة فقط .

يعني مش هتقدروا تنتقدوا الحكم العسكري في البرنامج ؟
أيوه مش هننتقده ليس لعدم المقدرة . بل لعدم الاتاحة . ببساطة: لو القناة عملت يوم مفتوح وانتقدت الحكم العسكري بشدة .. تعالى بقى نحسبها بالورقة والقلم : انت كسبت ايه ؟ مكسبتش حاجة .. طيب انت خسرت أيه ؟ خسرت قناة ممكن ترد على العلمانيين في تدليساتهم على العوام وتشويه الإسلام .

ومفيش اي قناة بتسمح بانتقاد الحكم العسكري . ولو هتقول اعمل ع  ” اليوتيوب ” هقولك ببساطة: انا يهمني العوام اللي قاعدين في البيت وميعرفوش عن الكمبيوتر إلا شكله . وكمان اليوتيوب في اخوه أفاضل قايمين بالواجب ولهم جهد مشكور . ليه أنا أروح أكرر نفس اللي هما بيعملوه ؟ مش لازم نوزع المهام برده ؟

================ .

هل البرنامج هيطبل للانقلاب ؟ لا

هل البرنامج سيضر الانقلاب ؟ لا

يعني البرنامج ولا هيضرهم ولا هيفيدهم . لكن هيفيد غيرهم لما نكشف حقيقة بني علمان . يعني في افادة واقعة بدون ضرر . انت زعلان ليه ؟

هل قناة أمجاد تبع حزب النور ؟

شوف يا سيدي . الكلام اللي هقولهولك ده مش أسرار . بل ستجد العشرات – إن لم يكن المئات – ممن يعلمون هذا الأمر . يشهد الله فيما أعلمه أن القناة ليست تابعة لحزب النور لا من قريب ولا من بعيد . وبالعقل : ازاي تبع حزب النور وهيكون عليها برنامج ” لأبو اسماعيل ” و ” أبو البخاري ” و ” طارق الزمر ” ومفيش برنامج واحد لحد من حزب النور ! هتقول أبو البخاري مشي من القناة . ده صحيح ولكن مشي عشان ” خلاف إداري ” فقط وليس لقيود فُرضت عليه . والشهود على ذلك كثير . والشيخ محمد عبد المقصود هو اللي مشي من القناة

وازاي هتكون تبع حزب النور وصاحب القناة ” الشيخ محمد صابر ” ضد الانقلاب  ! بل ان الشيخ محمد صابر غضبان من موقف حزب النور ! ودي صفحته الشخصية . هتدخل عليها هتحس انه ” حازمون ”😀 وانت تقولي تبع حزب النور ؟  https://www.facebook.com/saberfipco?fref=ts

وفي نفس الوقت الشيخ محمد صابر من اسكندرية ومتربي على يد مشايخ الاسكندرية . فلا تنتظر منه انه يطلع يسب في مشايخ الاسكندرية مثلاً . واختلف مهما تختلف مع مشايخ الاسكندرية ولكن ستجد اتفاق ان الكثير نهل من علمهم الشرعي .

وحط الجملة دي في برواز كده

===================================.

رغم اختلافي مع حزب النور في مواقفة السياسية من قبل أحداث العباسية إلى الآن ومعظمكم يعلم ذلك. إلا انه لا يوجد عندي غضاضة أن أتعاون مع حزب النور في محاضرات في مقارنة الأديان أو أي شئ يخص الدفاع عن ديني .. فحتى لو كانت قناة أمجاد تابعه لحزب النور – وهذه ليست حقيقة –  أو تابعة لحزب ” الدستور ” أو حزب ” الوفد ” فلن أتراجع عن اقتناص أي فرصة تُتاح لي للدفاع عن ديني . هذه قناعتي .
=================================== .

وخد عندك ( محمود داود على قناة أمجاد يقول لنادر بكار : الحياد وقت الشدة انحياز للباطل )

والكلام ده يوم 28/6 يعني قبل الانقلاب بيومين … شوف اللينك بنفسك

http://www.youtube.com/watch?v=V__uvreBP_I

 (محمود داود على قناة أمجاد) : لما الشيخ ياسر برهامي اتمنع من الخطابة قومتوا الدنيا ومقعدتوهاش , طيب عملتوا ايه لما المساجد تم حصارها ؟ يعني خايفين على الشيوخ ومش خايفين على المكان اللي من خلاله ستخطب الشيوخ اللي هو المساجد ؟
شوف الفيديو ده من الدقيقة 8
http://www.youtube.com/watch?v=_LPronXtOUM

طيب يا ترى لو القناة تابعة لحزب النور ليه محدش فيهم قالي متنتقدش حزب النور !

وفي أخوة مُعدين ساهموا معنا في برنامج ” الارهابي ” اسألوهم هل كنا بنوجههم ان لا يأتوا بمقاطع مثلا فيها انتقاد لحزب النور أو كنا بنوجههم في أي اتجاه ؟ و الاخوة لم يتقاضوا ” شلن ” ومساهمتهم معنا لوجه الله . يعني لو رأوا ما لا يسرهم أو يخالف مبادئهم أكيد كانوا خلعوا . وأذكر منهم على سبيل المثال لا للحصر ( أحمد الترك -أحمد البخاري – كمال اليماني – البراء عبد الله – زياد أشرف – أسامة أشرف – مصطفى علي – إبراهيم عليان – هند رفاعي – بلسم شعلان – شريف وحيد  )  وغيرهم . والاخوة كلهم بلا استثناء ليسوا من حزب النور ولو عايزين نخصصهم رغم انهم لا يتنتمون إلى أي فصيل ولكن تقدر تقول هم ” حازمون على أحرار ” . وأعتذر لو نسيت حد .

طيب ليه قناة أمجاد متقفلتش  ؟

أولاً: قناة أمجاد تُبث من خارج مصر وليس من داخلها .

ثانيًا: وما يوجد في مصر هو مكتب ” انتاج اعلامي ” يُنتج برامج لقناة أمجاد التي تبث من خارج مصر

ثالثًا: ستوديوهات شركة الانتاج الاعلامي التي تتنج برامج لقناة أمجاد . تقع خارج مدينة الانتاج الاعلامي . وكل القنوات اللي اتقفلت ” الحافظ و الناس – الخ الخ ”  كانت داخل مدينة الانتاج الاعلامي . والدليل ان قناة ” الندى ” و ” الأمة ” مفتوحين . لان استوديوهاتهم ليست داخل مدينة الانتاج الاعلامي .

رابعًا: بعد ما القنوات الاسلامية اتقفلت . ذهبوا إلى مقر شركة الانتاج الاعلامي التي تُنتج برامج لقناة أمجاد . وتم الاستيلاء على أجهزة المونتاج والهاردات وكل البرامج المسجلة وتم تسريح أكثر من نصف العاملين بها . وتكبدت القناة خسائر بالملايين . وحضرتك تقولي ما دام ما القناة متقفلتش يبقى القناة تبع الانقلاب !

خامسًا: الكلام اللي انا بقوله ده معلوم لدى العشرات – إن لم يكن المئات – يعني مش بقول اسرار مثلا . بس زي ما قلتلك في الاول: مش عشان انت مش عارف الموضوع ده كله تسارع في كيل الاتهامات حتى بدون ما تفكر تسأل !

هل فتحوا قناة أمجاد عشان تلهي الناس عن قناة الجزيرة ؟

ومين قالك اصلا ان قناة أمجاد اتفلت ؟ قناة أمجاد مفتوحة ولم تغلق إلا يوم واحد فقط . يعني كانت شغالة ولم تلهي الناس عن متابعة الجزيرة ! ولا عشان ( محمود داود – معاذ عليان ) هيظهروا مرة تانية على قناة أمجاد وبكده هيشغلوا الناس عن متابعة قناة الجزيرة ؟ أول مرة أعرف اننا نجوم بالشكل ده وهنخطف الناس من متابعة قناة الجزيرة .. جرااا أيه يا ابن عمي ؟ ما تقول كلام معقول شوية ؟!

وبعدين مهي قنوات الرقص والاغاني و المسخرة شغالة ليل ونهار . ولم تشغل الناس عن متابعة قناة الجزيرة . هتيجي بقى قناة أمجاد اللي هتخطف متابعي قناة الجزيرة !!!

في النهاية:

بعد اللي حضرتك قرأته ده اذا كنت قرأت يعني . ياريت تبقى محرج قبل ما تفكر انك تتهمني بسخافات بتكتبها بـ كي بورد من خلف شاشة . ولو كنت بتستفسر لمجرد المعرفة . فده من حقك عليا واتمنى اكون جاوبتك . واللي جاي بيقول ” يا ترى انت اخدت كام ” . هقولك أنا أخدت نفس المبلغ اللي أنا أخدته عشان أحضر مجزرة ” رابعة العدوية ” وشفت الموت فيها بدل المرة عدة مرات . و وجودي هناك لم يكن بالصدفة . بل لما علمت ان هناك أقاويل تتردد بكثرة عن فض الاعتصام . ذهبت الى ميدان رابعة الساعة 3:30 ويشهد على ذلك ” رامي ”  . ويشهد ( اسماعيل جاد ) وكان بيهزر معايا ويقولي: انت وجهك وجه شهيد . يعني انت جاي عشان تتقتل النهارده . . ويشهد على ذلك ( الشاويش عطية ) قبل المجزرة بـ 5 دقايق قالي( يلا نتوضئ ) عشان لو حصلنا حاجة نبقى على وضوء .. وقبل المذبحة ب 10 دقائق فقط كنت بدور على رصيد عشان أطمن أهلي و ( محمد جلال ) كان بيحول لي رصيد لكن الشبكة كانت واقعة والحمد لله قدرت أشحن من سوبر ماركت وطمنت اهلي . ويشهد على ذلك ” حسام أبو البخاري ” كنت معاه بعد بداية المجزرة ثم تفرقنا .. وبعد ما خرجت من الميدان الساعة 1:10 قابلت ( احمد كيشو ) عند ميدان الساعة وكنت منهك . واستلفت موبايله عشان اعمل منه مكالمة اطمن بيها أهلي اني خرجت من الميدان حي . لان البطارية كانت خلصت … وعشان اعمل برنامج ” سلاح ابيض ” اخدت نفس المبلغ اللي اخدته عشان أكون موجود يوم مجزرة رابعة وأقابل الموت عدة مرات . وكمان دفعت نصف المبلغ ده لأهلي . لان بطارية موبايلي فصلت ع الساعة 8 او 9 الصبح وفضلوا عايشين في رعب ومش عارفين يطمنوا عليا لان تليفوني اتقفل . ومخرجتش من الميدان الا بعد الساعة واحدة .. بجد عيب عليكم : )

وعلى فكرة .

لما حاورت وناظرت قساوسة النصارى . قالوا عليا بتاع فتنة

لما نزلت مظاهرات كاميليا شحاتة قبل وبعد الثورة . قالوا عليا متطرف

لما نزلت في محمد محمود والعباسية . قالوا عليا مخرب

لما نزلت في رابعة ورمسيس . قالوا عليا ارهابي .

ببساطة: مفيش وقت وكل الناس رضيت عني . ولكن لازم يكون لي ” تهمة ” أتشرف بها ولا أخجل منها اطلاقًا . ولم أكتب أو سبق وقلت ” كلمة ” لرضا أحد . وأعلم تمام العلم ان رضاكم غاية لا تُدرك ولا أسعى له .

وأحب أقول: انا تحملت سب واغراء ومضايقات وتهديد النصارى لي ولأهلي لعدة سنوات . يبقى مش هتحمل سوء ظن بعض المسلمين ؟ دي حتى تبقى عيبة في حقي .. عيشوا حياتكم وخدوا راحتكم يا بشر . ده انتوا مسلمين برده وأنا منكم وأنتم مني : )

7 تعليقات

Subscribe to comments with RSS.

  1. Abuidres Almesry said, on أكتوبر 24, 2013 at 7:45 م

    ربنا يوفقك ياميمو

    أنا كنت متبعك من أيام البالتوك غرفة وسام عبد الله

    ولم أعلم عنك إلا كل خير

    يسر الله لك وجعلك حنظلة العدا وشوكة في حلوقهم

    يلتمرة الأحباب🙂

  2. Abuidres Almesry said, on أكتوبر 24, 2013 at 7:46 م

    *يا تمرة الأحباب ( تصحيح ) 😦

  3. haitham al bdiny said, on أكتوبر 24, 2013 at 8:03 م

    كل اللي اقدر اقلهولك ياد انت ياميمو والله العظيم انا فخور بمعرفتك وان كنت حاولت التواصل معك لمقابلتك ولكن انت السبب في عدم المقابله احب اقلك ياصعيدي والله بحبك ياتري عرفتني ولا لا

  4. أبو عمر الباحث said, on أكتوبر 24, 2013 at 8:06 م

    حبيبي يا ميمو
    توكل على الله ولا تلتفت.
    ديننا أغلى من أشخاصنا, والنبي صلى الله عليه وسلم وهو أشرف البشر على الإطلاق لم يسلم من الاتهامات الباطلة.
    فتوكل على الله, وليكن شعارك ( أينقص الدين وأنا حي ) ؟

  5. جمال عبد الغنى said, on أكتوبر 24, 2013 at 10:58 م

    الله يوفقك

  6. maha salah said, on أكتوبر 25, 2013 at 3:11 م

    ربنا يوفقك وجزاك الله خيرا

  7. akram mohamed ali said, on أكتوبر 26, 2013 at 8:18 ص

    اعانك الله اخى الحبيب
    بن مظعون المصرى


أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: